Иако често се зборува дека жените во спортот не се платени доволно според нивната вредност, тенисот е еден од најдобрите примери дека квалитетот и успехот на спортистките сепак се препознаваат. И покрај тоа што јавноста сè уште посветува поголемо внимание на машките спортови, женскиот тенис континуирано докажува дека заслужува исто толку респект – и финансиски и медиумски.

Кога станува збор за заработка, Коко Гауф повторно се најде на врвот. Таа е најплатената спортистка на најновата листа на Forbes, што уште еднаш покажува колку нејзиното влијание оди подалеку од самиот терен. Нејзината заработка не доаѓа само од турнири, туку и од бројни спонзорски договори и комерцијални ангажмани.

Иако од настапите на турнирите заработила околу 8 милиони долари, најголемиот дел од нејзиниот приход – дури 25 милиони долари – доаѓа од активности надвор од тенисот. Со тоа, нејзината вкупна заработка достигнува 33 милиони долари. Ова не е изненадување, со оглед на тоа што Гоф е млада, харизматична, игра со огромна енергија и веќе е меѓу најдобрите во светот во својот спорт.

Заслужен успех на светската тениска сцена

Ако се спореди со сите тенисери, без разлика на пол, Коко Гауф се наоѓа меѓу највисоко платените, веднаш зад Карлос Алкарас и Јаник Синер – двајцата доминантни имиња во машкиот тенис во последните години. Тоа само го потврдува нејзиниот статус како глобална спортска ѕвезда.

На второто место меѓу жените се најде Арина Сабаленка со вкупна заработка од околу 30 милиони долари, рамномерно распределени меѓу турнирските награди и спонзорските приходи. Таа веќе две години по ред е на врвот на ВТА-листата и, со оглед на тоа што има само 27 години, реално е да се очекува нејзиниот успех да продолжи.

Високите заработки не застануваат тука. Ига Швјонтек се најде веднаш зад нив со над 25 милиони долари, додека Ќинвен Женг, Медисон Кис, Наоми Осака, Елена Рибакина и Џесика Пегула исто така се дел од топ-десет листата на најплатени тенисерки во светот.

Заклучокот е јасен: женскиот тенис е на исклучително високо ниво, а најдобрите тенисерки заслужено го наплатуваат својот труд и успех – и на теренот и надвор од него. Останува надежта дека во иднина сè повеќе љубители на спортот ќе ја препознаат и ценат извонредноста на тенисерки како Коко Гауф и Арина Сабаленка.